Ek average middle class aur ek upper class ke vyakti mein kya difference hota hai? Yahi na, ki middle class wale ke pass kam paise hote hain wahi upper class wale ke pas jyada? Par akhir ye difference paida kaha se hota hai? Almost har bar ye difference aata hai unki income ke sources se. Jaha ek middle class vyakti ke pass income ka ek hi source hota hai, wahin ek wealthy insaan ki wealth ek se jyada sources se aati hai. Par ek se jyada sources of income ko banane se pehle humko ye baat pata to honi chahiye ki income ke sources kya kya ho sakte hain. Islie is video me main aapko bataunga 7 Sources of income jinse ek average millionaire apni wealth banata hai. Iske alawa video ke ant mein main aapko kuch tareeke bataunga jisse aap abhi ke abhi ghar baithe baithe inme se kuch sources of income bana sakte hain. Sabse pehli aur sabse common source hain earned income. Ek average insaan ki mainly yahi ek matra source of income hoti hai. Typically jab aap koi job karte hain, aur salary lete hain, tab aap earned income se paise kama rahe hote hain, ek chote ohde ke karmchari se lekar CEO level ke karmchari tak, sab earned income kama rahe hote hain. Ji han! CEO bhi company ka employee hi hota hai. Self employed professionals jaise ki doctors, lawyers aur yahan tak ki freelancers bhi isi category mein aate hain. Earned income tab banti hai jab aap apne time ke exchange mein paise lete hain, islie isko active income bhi kaha jata hai kyunki jab tak aap actively kaam karte hai keval tab tak aapke pass ye income aati hai. Bade se bade millionaires bhi apni shuruat active income se hi karte hain aur starting ke liye ye ek achha point bhi hota hai. Jab aapke pass apna aur apni family ka kharcha chalane ke liye koi income ka stream nahi hota tab active income ka source aap jaldi se dhoondh sakte hain. Par agar aap isi category me lambe samay tak bane rehte hain tab aapke liye ye category khatarnak sabit ho sakti hai kyunki ye income poori tarah se aapke time par depend karti hai jo ki aapke pass limited hi hota hai. Aapke pass bhi doosron ki tarah 24 ghante hote hain aur islie ek point par aakar is income ko badhaya nahi ja sakta. Islie starting stage mein to earned income sahi hai par kuch samay baad aapko doosre types ki income banani jaroori hoti hain. Iske baad aata hai humara doosra type Profit Income. Ye income tab aati hai jab aap koi bhi product ya service ko manufacture kar ke sell karte hain. Manufacturing karne me jitna kharcha aata hai usse jyada keemat par aap aapka product ya service sell karte hain jisse profit generate hota hai. Is stage par aakar aap ek employee se ek entrepreneur ban jate hain kyunki ab aap naukri ki jagah business kar rahe hote hain. Pehle ke time mein ek business start karna bahut kathin kaam hota tha kyunki isme bade level ka investment chahiye hota tha aur har kisi ke pass investment karne ke liye paise nahi hote the. Par internet ke aane ke bad se bahut kam ya bina investment ke bhi business start karna possible ho gaya hai. Profit income bhi do type ki ho sakti hai Active income aur Passive income Agar aap product khud apne haathon se manufacture kar rahe hain, to ye ek active income hogi. Isme bhi aap jab tak kaam kar rahe hain tabhi tak income aayegi. Example ke liye handicrafts, paintings wagerah agar aap khud bana kar bech rahe hain to ye active profit income hogi. Active profit income ke model ko aap bade scale par nahi le ja sakte. Par agar aap apne product ko bas design kar rahe hain aur koi manufacturer aapke liye product bana raha hai, ya fir aap koi digital product banate hain to is profit income ko bade scale par le jane aur isko passive income banane ke chances aapke pass jyada hote hain kyunki isme agar aap ek bar apne business ki process set kar lete hain, ya employees hire kar lete hain to aapke pass fir free time bachta hai. Kabhi bhi koi bhi business start karne se pehle humko ye dekhna jaroori hota hai ki wo ek bade level tak scale kiya ja sakta hai ya nahi? Teesri income category hoti hai Interest Income. Ye income tab hot hai jab aap kisi ko apne paise udhar dete hain aur us par interest lete hain. Bank deposits, government bonds, debentures, fixed deposit wagerah interest income kamane ke kuch mediums ho sakte hain. Ye income poori tarah se passive income hoti ha kyunki isko kamane ke liye aapko actively kaam nahi karna padta. Aksar dekha jata hai ki aap jo paise lend karte hain us par jyada interest to nahi aata par aap safely assume kar sakte hain ki yahan se aapko ek stable amount me returns milte rahenge. Apni pehchan walo, rishtedaro ya doston ko paise interest par dena avoid karein, isse aapke relations kharab ho sakte hain. Chouthi income category hain Dividend Income. Dividend income tab milti hai jab aap kisi company mein invest karte hain, aur wo company jo profit kamati hai, us profit ka kuch hissa aapko dividend ke form me deti hai. Jab aap kisi company ke share kharidte hain to us company par kuch malikana haq aapka bhi ho jata hai Aur isi karan aap uske kuch profit ke haqdar bhi ban jate hain. Islie company apne shareholders ko profit me se dividend deti hai. Dividend generally har quarter, matlab ki har teen mahine me diye jate hain. Ab ye jaroori nahi hai ki har company aapko dividend de. Har company ka dividend dene ka apna apna tareeka hota hai. Agar aapka invest karne ka main motive dividend kamana hai, to pehle thodi rsearch karein ki kaunsi company ek achhi dividend dene ki history rakhti hai. Paanchvi category hai Rental Income. Ya fir, kiraye se aane wali income. Rental income ka funda simple hai, jab aap aapka koi asset kisi ko use karne ke liye dete hain aur uske badle mein kiraye ke roop mein paise lete hain to ye income rental income kehlati hai. Generally ghar ya car ko rent par de kar log paise kamate hain. Par aisa mana jata hai ki commercial property se sabse jyada rental income milti hai. Commercial propert matlab ki wo jagah jiska use business karne me ho sakta hai. Agar aapki building mein koi dukan khol raha hai, hospital khol raha hai ya aisa hi koi doosra business kar raha hai to usse aapke pass jyada rent aayega. Wahin agar aapki building ek ghar ke form me use ho rahi hai jisme aapke kirayedar reh rahe hain to usse aapki rental income kuch kam aayegi. Jaroori nahi hai ki aapko rental income ke liye bade bade investments hi karne pade, aap kam investment wali cheeje bhi rent par de sakte hain. Jaise ki koi instruments, events ke liye speaker system, hand carts etc. Humari chathi income source hai Residual aur Royalty Income. Is source se aapko aapke ek bar kiye gaye kaam ke liye future mein continuously income hoti rehti hai. Jaise agar aapne koi book likhi hai, to wo jab tak bikti rahegi, uski royalty aapko milti rahegi. Kuch authors ki books par movies aur TV serials bhi ban jate hain, aur aise case mein unko aur jyada royalty milti hai. YouTube par ek bar banayi gayi video ko jab tak log dekhte rehte hain, tab tak usko daalne wale ko income hoti rehti hai. Music banane walo ka music jitni bar log iTunes ya Spotify wagerah par sunte hain unko utna paisa milta jata hai. Photographers, illustrations, icons aur logo banane wale log bhi isi tarah apne creations ko ek bar bana kar hamesha income generate karte rehte hain. Aur akhir mein aate hain Capital Gains. Jab aapke kisi asset ki value badh jati hai, aur fir usko bech kar aap jo paise kamate hain, usko bolte hain Capital Gains. Waise to huma jyadatar wo cheezein lete hain jinki value time ke sath kam hoti jati hai Jaise mobile phone, car bike, tv. Par bahut si cheezein aisi bhi hoti hain jinki value time ke sath badh bhi sakti hai. Jaise stocks, property, metals jaise ki sona, chandi. Maan lijiye aapne koi cheej 1 lakh rupay mein kharidi thi, aur time ke sath jab us cheej ki value 1.5 lakh rupay ho gayi tab aapne usko bech diya, to jo 50 hajar rupay ki extra income aapko hui wo kehlayegi Capital Gains. To ye thi 7 alag alag types ki incomes agar aap inme se koi bhi type ki income shuru karna chahte hain to main aapki help karne ki poori koshish karunga. Aap comments ke through mujhse sawal pooch sakte hain. Hamesha yaad rakhiye ki kabhi bhi ek hi source of income par dependent mat rahiye. Choti choti hi sahi par aapke pass multiple sources of income honi chahiye. Ab main aapko bataunga ki inme se kuch sources of income kaise aap ghar baithe baithe bana sakte hain. Par isse pehle main aapko batana chahta hun KitKTS channel ke bare mein. Ye channel bhi mere channel ki tarah hi bahut informative videos banata hai. Aap ek bar is channel ko ja kar dekhein, aapko ye channel pasand jaroor aayega. Aur achha lage to subscribe jaroor kijiyega. To chaliye ab hum humare video ko continue karte hain. Sabse pehle interest income. Interest income start karne ke liye aap ghar baithe mutual funds mein invest kar sakte hain. Iske liye aap mutual funds ki website par ja kar apne sare legal documents upload kar ke directly mutual funds mein paise daal sakte hain aur iske alawaa ajkal bahut si mutual funds apps bhi chalti hain, jinse aap apne phone ke through hi invest kar sakte hain. Main khud do saal se app ke though invest kar raha hun aur abhi tak lagbhag 10 hajar rupay kama chuka hun. Bas ye baat dhyan rakhiye ki interest income ke liye aapko interest dene wale mutual funds mein invest karna hai, jaise ki liquid funds, debt funds wagerah. Iske baad dividend income bhi aap ghar baithe kama sakte hain. Iske liye aapke pass do tareeke hain. Sabse pehla hai direct stocks mein invest karke aur doosra tareeka hai mutual funds. Direct stocks mein invest karne ke liye aapko Demat aur trading account khulwana padega, Jo ki kisi bhi stock broker ki site par ja kar khul sakta hai. Aur mutual funds ka tareeka main aapko pehle hi bata chuka hun bas dividend income ke liye aapko debt funds ki jagah equity waale funds mein invest karna padega. Royalty income ka sabse badhiya tareeka hai ki agar aap logo wagerah bana sakte hain, ya computer par drawing karne me mahir hain to Shutterstock, Canva wagerah jaisi sites par apni banayi hui images ko share kijiye. Aur agar aap kisi subject mein expert hain to YouTube channel start kijiye ya Udemy jaisi sites par apne courses upload kijiye. To is video mein abhi tak ke liye itna hi. Mere is channel ko subscribe jaroor kijiyega aage aur bhi aisi hi knowledgeable videos ke liye.